Digital agentlikni qanday tanlash kerak: 10 savol

Digital agentlikni va’da bilan emas, javob bilan tanlang. Ish boshlashdan oldin 10 ta savol bering: reklama kabineti kimniki, hisobot qaysi raqamlar bilan, keyslarda davr va raqam bormi, raqamlar kimniki, kim aniq ishlaydi va narxga nima kiradi. Aniq javob bo‘lmasa, bu ham javob.

1. Reklama kabineti kimning nomida bo‘ladi?

To‘g‘ri javob: sizning nomingizda yoki sizga to‘liq kirish bilan. Ish to‘xtasa, kabinet, piksel va auditoriyalar sizda qolishi kerak. Bizda reklama byudjeti mijozning o‘z kabinetidan sarflanadi, shuning uchun pul harakatini ham o‘zingiz ko‘rib turasiz.

2. Reklama byudjeti narxga kiradimi?

Xizmat narxi va reklama byudjeti ikki xil pul. Ularni aniq ajrating. Bir summada aytilsa, qancha pul reklamaga, qanchasi xizmatga ketayotganini bilmaysiz. Shuning uchun narxlar sahifamizda byudjet alohida ekanini ochiq yozganmiz.

3. Hisobot qaysi raqamlar bilan beriladi?

Hisobotda so‘rovlar soni, CPL va sarflangan byudjet bo‘lishi kerak. Qamrov va obunachilar yordamchi raqamlar. Hisobot namunasini ish boshlashdan oldin so‘rang. Namunada faqat ko‘rishlar va layklar bo‘lsa, sizga ham shu keladi. Hisobot qanchalik tez-tez kelishini ham aniqlang. CPL nima ekanini bilmasangiz, shu maqolani o‘qing.

4. Keyslarda davr va raqam bormi?

Yaxshi keysda vazifa, nima qilingani, davr va natija raqami bo‘ladi. “Savdo oshdi” degan gap keys emas. Qaysi oylar, qancha byudjet, qancha lid, deb so‘rang. Raqamsiz keys ham bo‘lishi mumkin, masalan brending loyihasi, lekin u natija sifatida ko‘rsatilmasligi kerak.

5. Bu raqamlar kimniki?

Savol noqulay, lekin zarur. Natija agentlikkami, xodimning oldingi ishigami yoki asoschigami tegishli? Biz Meta Ads jadvalida buni aniq yozganmiz: bu asoschi boshqargan 20 ta akkaunt, manbasi va cheklovlari bilan. Shunday aniqlikni boshqa agentlikdan ham so‘rang.

6. Mening loyihamda kim aniq ishlaydi?

Savdo paytida gaplashgan odam ishni bajarmasligi mumkin. Kim targetolog, kim kontent qiladi, kim video oladi, aloqa uchun kim javob beradi? Bitta aloqa nuqtasi bo‘lsa, yaxshi: beshta odam bilan alohida yozishish vaqtni yeydi.

7. Narxga aniq nima kiradi?

“Dan” bilan yozilgan narxdan keyin nima qo‘shilishini so‘rang. Kreativlar kiradimi? Video-chi? Piksel sozlash-chi? Ro‘yxatni yozma ravishda oling. Yaxshi agentlik bunday ro‘yxatni o‘zi beradi va undan tashqaridagi ish qancha turishini ham oldindan aytadi.

8. Lid sifati qanday tekshiriladi?

Arzon lid sotuvga aylanmasa, oxirida qimmatga tushadi. Agentlik sotuv bo‘limingiz bilan gaplashadimi, sifatli lid mezonini kelishadimi? Mudarris keysida reklama bilan birga sotuv bo‘limi tahlil qilingan va lidlar bilan ishlash tizimlashtirilgan: lid sifati faqat reklamaga bog‘liq emas.

9. Birinchi oyda nima sinaladi va qanday o‘lchanadi?

Bu kafolatdan ko‘ra foydali savol. Javob aniq bo‘lishi kerak: qaysi auditoriya, qaysi kreativ, qaysi raqam muvaffaqiyat hisoblanadi. “Ko‘ramiz, sozlaymiz” degan javob reja emas.

10. Natija kafolatlanadimi?

Reklama natijasi bozorga, taklifga, narxga va sotuv bo‘limiga ham bog‘liq. Shuning uchun “100% kafolat” degan gapdan ehtiyot bo‘ling. Biz natija va’da qilmaymiz: nimani sinashimizni va qanday o‘lchashimizni aytamiz. Kafolat aytilsa, shartlarini so‘rang: nima kafolatlanadi, qanday o‘lchanadi, bajarilmasa nima bo‘ladi?

Javoblarni qanday baholash kerak?

Bitta qoida: aniq javob chiroyli va’dadan yaxshiroq. Agentlik “bilmaymiz, tekshirib aytamiz” desa, bu yomon belgi emas. Savoldan qochsa yoki javobi har safar “tajribamiz katta” bo‘lsa, bu yomon belgi.

Amalda shunday qiling:

• Bir nechta agentlikka bir xil savollarni bering.
• Javoblarni yozib oling va yonma-yon qo‘ying.
• Faqat narxni emas, narxga nima kirishini solishtiring.
• Kim bilan ishlashingizni ko‘ring: savol berganda kim javob beryapti, u ishda ham qatnashadimi?

Javoblarni birinchi suhbatdan keyin bir kun o‘ylab ko‘ring, shoshilmang. Yuqoridagi savollarning birortasiga “bu sir” deyilsa, ehtiyot bo‘ling. Mijoz nomi yoki aniq byudjet maxfiy bo‘lishi mumkin, lekin o‘lchash usuli va hisobot shakli maxfiy bo‘lmaydi.

Qaysi javoblar ogohlantirishi kerak?

• “Kabinet bizda qoladi”: ish to‘xtasa, reklama tarixi va auditoriyalardan ayrilasiz.
• “Hisobotda qamrov va obunachilar bo‘ladi”: pul nimaga ketganini ko‘rmaysiz.
• “Natija 100% kafolatlanadi”: o‘lchash usuli aytilmasa, bu gap hech narsani anglatmaydi.
• “Narxni ishni boshlagach aytamiz”: hajm va ro‘yxat oldindan kelishilishi kerak.

Bu savollarni Advigo’ga ham berish mumkinmi?

Ha, shunday qiling. Xizmatlar va keyslarni oldindan ko‘rib chiqsangiz, suhbat tezroq bo‘ladi. Savollaringizni aloqa sahifasi orqali yuboring: qaysi birini aniq javob bera olishimizni va qaysi biri loyihangizga bog‘liqligini ochiq aytamiz.